Home Labaru Kiwon Lafiya Martani: NAFDAC Ta Karyata Rahoton Da Ke Cewa Jabun Magunguna Sun Karade...

Martani: NAFDAC Ta Karyata Rahoton Da Ke Cewa Jabun Magunguna Sun Karade Nijeriya

291
0

Shugabar hukumar kula da ingancin magunguna da abinci ta kasa NAFDAC Moji Adeyeye, ta karyata rahotannin da ke cewa hukumar ta ce mafi yawan magungunan da ake saidawa a Nijeriya duk na jabu ne.

Idan ba a manta ba, a ranar 19 ga watan Afrilu, jaridar ‘Vangard’ ta wallafa labarin da ke cewa NAFDAC ta ce kashi 70 cikin 100 na magunguna a Nijeriya na jabu ne.

Hakan ya sa Adeyeye ta bukaci mutane, da ma’aikatan kiwon lafiya da masu ruwa da tsaki su yi watsi da wannan rahoto domin babu gaskiya a cikin shi.

Ta ce tun da ta hau kujerar shugabancin hukumar ta maida hankali wajen ganin an kauda jabun magunguna a Nijeriya.

Moji Adeyeye, ta ce a shekara ta 2005, hukumar NAFDAC tare da hadin gwiwar kungiyar lafiya ta duniya da kamfanin Pharmacopeia da ke kasar Amurka, sun gudanar da bincike a kan jabun magungunan da ke Nijeriya, inda su ka gano kashi 16 cikin 100 ne kawai na jabu.