Abba Kyari: COVID-19 Ta Kashe Na Hannun Daman Buhari

Annobar coronavirus ta yi sanadiyyar mutuwar Shugaban Ma’aikatan Fadar Shugaban Kasar Najeriya, Abba Kyari.

A tsakar daren Juma’a 17 ga Afrilun 2020 ne Abba Kyari ya rasu a inda ake jinyarsa bayan kamuwarsa da cutar coronavirus.

An ci gaba da jinyar Abba Kyari a Legas ne bayan ya yanke shawarar komawa Legas daga Abuja, inda ya dauki nauyin kula da lafiyarsa daga aljihunsa.

Kakakin Shugaban Kasa, Malam Garba Shehu ya sanar da haka a cikin sakon da ya fitar ta shafinsa na Twitter.

Abba Kyari shi ne mutum mafi girman matsayi da cutar COVID-19 ta fara kamawa a Najeriya. Kana kuma a kansa aka fara samun bullar cutar a fadar shugaban kasar.

An gano yana dauke da cutar ne bayan dawowarsa daga kasashen waje.

Kamuwarsa da cutar ta haifar da fargabar yaduwar COVID-19 a tsakanin gwamnoni da wasu manyan jami’an gwamnati da suka yi hulda da shi kafin bayyanr cutar tasa. Hakan ta sa wasu daga cikinsu killace kansu.