Home Labaru Zargin Kisan Fararen Hula: Kwamitin Rundunar Sojin Sama Ta Najeriya Ya Isa...

Zargin Kisan Fararen Hula: Kwamitin Rundunar Sojin Sama Ta Najeriya Ya Isa Jihohin Katsina Da Zamfara

239
0

Kwamitin bincike na rundunar sojin sama ta Najeriya kan zargin kisan fararen hula a jihohin Katsina da Zamfara ya isa jihohin domin bincike kan hakikanin abin da ya faru.

A lokacin da yake zantawa da manema labarai jim kadan bayan kai ziyarar, shugaban kwamitin Air Vice Marshal IG Lubo, ya ce kwamitin zai gana da dukkanin masu ruwa da tsaki a jihar.

Sannan zai gana da iyalan wadanda suka rasa ‘yan uwansu, da sarakunan gargajiya da kuma dukkanin manyan jami’an soji dake gudanar da ayyukansu a yankunan.

Ya ce rundunar sojin sama ta damu matuka a lokacin da aka bayyana zarge-zargen da ake yiwa jami’anta.

Ya kara da cewa idan har hakan ya faru ba yadda za a yi rundunar ta boye, kuma za ta dauki matakin da ya kamata, domin magance faruwar hakan a nan gaba, tare da hukunta duk wanda aka samu da laifi.