Gobara Ta Tashi A Babbar Kasuwar Onitsha

Wata wutar gobara mai ban mamaki ta tashi da sanyin safiyar Talatar nan a babbar kasuwar birnin Onitsha na jihar Anambra.

Babbar Kasuwar dai ita ce kasuwa mafi girma a yammacin Afirka kuma ta na da dimbin ‘yan kasuwa, wadanda galibi masu shigo da kayayyaki ne su na kuma hada-hadar kayayyaki iri daban-daban.

Wata dan kasuwa Mista Barth Ifediora, ya ce gobarar ta tashi ne da sanyin safiyar Talata a wani sashe da aka fi sani da fadar White House. 

Fadar White House ita ce ofishin shugabannin kasuwar, wanda gini ne mai hawa biyu da dakunan taro a hawa na daya da na biyu sai kuma shaguna a kasa.

Wata majiya ta ce, yankin da gobarar ta fi shafa shi ne bangaren shagunan da ke karkashin WhiteHouse, inda ake saida kayan yadidduka masu tsada.