Siyasar 2023: Za Mu Bi Tsarin Jam’iyya Wajen Zaben Dantakarar Shugaban Kasa – Buhari

Shugaban kasa Muhammadu Buhari, ya ce jam’iyyar APC za ta tabbatar ta bi dokar jam’iyya wajen zaben dantakarar shugaban kasa a shekara ta 2023.

Buhari ya bayyana haka ne,  a wajen Taron Kwamitin Zartaswa na jam’iyyar APC da ya gudana a Abuja.

Ya ce idan su ka bar APC ta ruguje bayan shekara ta 2023 ba su yi mata adalci ba, dole su bi abin da doka ta ce sannan a rika yi wa jam’iyya da’a, kuma ko kadan ba su ji dadin abin da ya faru a jihohin Imo da Bauchi da Zamfara ba.

Shugaba Buhari ya kara da cewa, dole sai an zabi shugabanni nagari tun daga zaben mazabu har zuwa matakin kasa sannan za a samu natsuwa da ci-gaba da kuma bin tsarin doka.

A karshe ya yi kira ga ‘yan jam’iyyar APC su daina bin ra’ayin su ko nuna son kai da kin bin abin da tsarin dokar jam’iyya ya tanada.