Shugaba Buhari Ya Tafi Birnin Landan Na Burtaniya

Shugaban Kasa Muhammadu Buhari ya tafi birnin Landan a yau litinin din nan domin a duba lafiyarsa.

Bayanin tafiyar yana kunshe ne a cikin wani sako da Kakakin shugaban, Femi Adesina ya wallafa a shafinsa na Twitter inda ya ce ana saran Buhari zai dawo gida Najeriya ne cikin mako na biyu a watan Nuwamba.

A baya dai shugaban ya sha tafiya Landan domin duba lafiyarsa tun lokacin da ya fara jagorantar kasar nan.

A 2017, Shugaban ya kwashe kwanaki 150 a Burtaniya a wata tafiyar duba lafiyar da ba a bayyana abin da ke damun sa ba.

Buhari ya kara komawa Burtaniya a watan Mayun 2018 domin ganin liktansa, inda ya yi kwana hudu kacal a kasar ta Burtaniya.

A watan Nuwambar 2020 ne, mai dakin shugaban kasar Aisha Buhari, ta ce akwai bukatar a inganta bangaren lafiyan Najeriya domin a rage tafiye-tafiyen neman magani kasashen waje.