Al’ummomin Fulani da Irigwe da ke Karamar Hukumar Bassa ta Jihar Filato, sun sanya hannu a kan jarjejeniyar zaman lafiya a tsakanin su.
Shugabannin kabilun biyu sun sanya hannu a kan yarjejeniyar ne a gaban Gwamnan Jihar Filato Simon Lalong a gidan gwamnatin jihar da ke garin Jos.
Yankin Bassa dai ya kwashe shekara da shekaru ya na fama da rikice-rikice tsakanin al’ummomin Fulani da kablar Irigwe.
Da ya ke jawabi yayin taron sanya hannu a kan yarjejeniyar, Gwamnan Lalong ya bayyana farin cikin sa da matakin da al’ummomin su ka dauka, inda ya ce sun nuna wa duniya cewa sun gaji da rikice-rikice a yankin su, don haka su ka kudiri aniyar yafe wa juna domin kare faruwar rikici-rikice a nan gaba.
Sarkin Miango Rebaran Ronku Aka, ya gode wa Gwamna Lalong a kan kokarin sa na ganin an samu zaman lafiya a yanki da ma jihar Filato baki daya.
