Babu Dalibin Da Ya Kamu Da Cutar Corona A Jami’ar Bayero – Farfesa Yahuza

Hukumar Jami’ar Bayero da ke jihar Kano ta karyata batun cewa an samu bullar cutar corona a jami’ar.

Idan dai ba a manta ba, a ranar Lahadi da ta gabata ne wasu suka fara yada farfagantar cewa, ma’aikatar Lafiya ta Jihar Kano ta tabbatar da samun wasu dalibai biyu da suka kamu da cutar corona a jami’ar Bayero.

Sai dai, shugaban Jami’ar Farfesa Muhammad Yahuza ya danganta labara a matsayin mara tushe balle makama, tare da cewa babu dalibai a dakunan kwanan jami’ar.

Farfesa Yahuza ya ce, tuni jami’ar ta bada hutun mako guda, sai kuma ga batun yajin aikin gargadi na makonni biyu da malaman jami’o’i suka shiga.

A karshe Yahuza ya yi Allah-wadai da wadanda suka kirkiri wannan labaran na karya, kana kuma ya yi kira ga masu yadawa irin wannan labaran da su guji yin haka.