Najeriya Na Bukatar Dala Biliyan 12 Don Tsaftace Bayelsa

Wani sabon rahoto ya nuna cewa, Niajeriya ta na bukatar
akalla Dala biliyan 12 domin gudanar da aikin tsaftace
malalar man fetur a jihar Bayelsa.

Rahoton ya bayyana manyan kamfanonin mai na Shell da Eni a matsayin wadanda su ka gurbata jihar Bayelsa, kuma za a dauki sama da shekaru 12 ana aikin tsaftace jihar.

Ma’aikatar Mai da Muhalli ta jihar Bayelsa ce ta tattara bayanai, bayan a shekara ta 2019 ta fara gudanar da bincike a kan tasirin malalar man fetur a jihar.

Haka kuma, Ma’aikatar ta nazarci wasu hujjoji da ta samu tare da gudanar da gwaje-gwajen jini a kan mutanen da ke rayuwa a yankunan da malalar man ta yi wa illa, inda ta gano cewa akwai guba mai yawa da tsiyayar man ta yadu a iska da ruwan sha har ma a cikin jinin al’umma.

Ma’aikatar ta ce akwai sakacin kamfanonin wajen samun wannan matsalar, domin sun gaza daukar matakan da su ka dace na kariya.