Rundunar Sojin saman Nijeriya ta na shirin aikewa da karin jiragen yaki kirar Agusta 109 zuwa jihohin Zamfara da Katsina da ke fuskantar matsalar hare-haren ‘yan bindiga.
Wata majiya ta ce, rundunar sojin za ta aike da jiragen ne bayan bikin cika shekaru 55 da kafuwar rundunar sojin sama da zai gudana a ranar Litinin mai zuwa, a matsayin wani sabon yunkuri domin kammala murkushe ‘yan bindigar da ke haifar da barazanar tsaro a jihohin uku.
Kakakin rundunar sojin saman Nijeriyar Air Commodore Ibikunle Daramola ya tabbatar da cewa, baya ga jiragen akwai kuma tarin dakaru da za a sake aikewa jihohin domin kawo karshen hare-haren ‘yan bindigar.
Ya ce za a kuma bude wata helkwatar musamman a Birnin Gwari da za ta rika kula da dakaru da kuma jiragen da ke yaki a jihohin ciki har da Kaduna. Kakakin ya ce, Babban Hafsan sojin saman Nijeriya Air Marshal Sadique Abubakar, tare da Gwamnan jihar Kaduna Nasir El-Rufai ne za su kaddamar da helkwatar.