Ministan ayyuka da gidaje Babatunde Raji Fashola, ya ce za a kammala hanyar da za ta hade Abuja da Birnin Algiers na kasar Algeria a cikin shekaru uku masu zuwa.
Duk da ya ke ya ce hanyar za ta ratsa kasashe irin su Nijar da Mali, hakan bai hana wasu sa shakku a lamarin ba.
A bangare daya dai wasu na cewa, a daidai lokacin da gwamnatin shugaba Buhari ya kamata ta maida hankali a kan gyaran hanyoyin cikin gida da ke fama da ramuka, bai kamata a tada zance makamancin wancan ba.
A lokacin da ya ke magana da manema labarai, ministan ya ce ya kamata a nuna ba dukkan hanyoyin Nijeriya ke da muni ba, kuma hakkin ‘yan jarida ne su bayyana wa ‘yan Nijeriya cewa akwai aikin da a ke gudanarwa.