Shugaban Majalisar Dattawa Sanata Ahmed Lawan, ya ce ya karbi hukuncin Babbar Kotun Tarayya da ya ce ba shi ne halastaccen dan takarar jam’iyyar APC a mazabar Yobe ta Arewa ba.
Matakin dai ya na zuwa ne, kwana guda bayan hukuncin kotun da ke zama a birnin Damaturu game da halastaccen dan takarar sanatan jam’iyyar APC na mazabar Yobe ta Arewa.
A wata sanarwa da ya wallafa a shafin sa na yanar gizo, Sanata Ahmed Lawan ya ce bayan tuntubar abokan harkar siyasa da magoya baya da abokan arziki, yaa yanke shawarar ba zai daukaka kara a kan hukuncin ba, don haka ya karbi kaddara.
Sanarwar Sanatan dai ta kunshi wani bayani mai alamta yin ban-kwana, inda ya yi godiya ga shugabannin siyasar jihar Yobe da ma al’ummar mazabar sa, wadda ya wakilta tsawon shekaru a majalisun tarayya.