Home Labaru Zamfara: Gwamnati Ta Kwace Kayan Abinci Da Man Fetur Da Aka Yi...

Zamfara: Gwamnati Ta Kwace Kayan Abinci Da Man Fetur Da Aka Yi Yunkurin Kai Wa ‘Yan Fashin Daji

21
0
Yan bindiga

Gwamnatin jihar Zamfara, ta ce ta kama wasu motoci dauke da kayan abinci da ababen sha da kuma man fetur da ake yunkurin kaiwa sansanonin ‘yan ta’adda a jihar.

Gwamnatin jihar ta kuma tabbatar da kama wasu mutane 100 da suka karya dokar kullen da aka sanya a fadin jihar domin yaki da ta’addanci.

Sakataren kwamitin ayyuka a bangaren tsaro na jihar Abdulrasheed Haruna, ya bayyana wa manema labarai haka a Gusau, inda ya ce gwamna Matawalle ya kafa wani kwamiti na musamman domin tabbatar da cewa an kiyaye dokar.

A ranar 26 ga watan Augusta da ya gabata ne, gwamnan jihar ya sanya hannu a dokar, wadda ke da alaka da sashin kundin tsarin mulkin Nijeriya na shekara ta 1999.

Da ya ke sanya hannu a kan dokar, gwamnan Matawalle ya ce, ya yi aiki ne da karfin ikon da sashi na biyar sakin layi na 2 da sashi na 176 sakin layi na 2 da kuma sashi na 315 sakin layi na 2 na kudun tsarin mulkin Nijeriya suka bayar.