Mai martaba Sarkin Kano Alhaji Aminu Ado Bayero, ya
bukaci zababben shugaban kasa Bola Ahmed Tinubu ya kafa
ma’aikatar harkokin addini domin inganta tattaunawa tsakanin
mabiya addinai da zaman lafiya a Nijeriya.
Basraken ya yi kiran ne, a wajen bikin kaddamar da Jagororin addini da kungiyar agaji ta Action Aid ta shirya a Kano.
Sarkin, wanda ya samu wakilcin Hakimin Nasarawa Babba Dan-Agundi, ya ce za a dora wa ma’aikatar ayyukan da su ka shafi inganta fahimtar addini da fahimtar juna a tsakanin ‘yan Nijeriya, ya na mai bayyana Kano a matsayin tushen zaman lafiya, inda mabiya addinai daban-daban ke zaune lafiya da juna.
Sarkin ya bayyana tattaunawar tsakanin mabiya addinan a matsayin wadda ta dace domin samar da zaman lafiya, ya na mai cewa Kano ta dade ta na rike da matsayi mai girma wajen karbar mabiya addinai daban-daban.