Ko Ni Na Tambaye Ka Fuloti A Abuja, Kada Ka Ba Ni – Tinubu Ya Faɗa Wa Wike

Shugaban kasa Bola Ahmed Tinubu, ya buƙaci ministan Birnin Tarayya Nyesom Wike da cewa, kada ya ba shi fili kyauta ko da ya nemi hakan.

Tinubu ya bayyana haka ne, a wajen taron kungiyar lauyoyin Nijeriya NBA da ya gudana a Abuja, inda ya ja hankalin Wike ya bayar da fifiko wajen kammala aikin hanyoyin cikin birnin Abuja domin ci-gaban al’umma.

Shugaba Tinubu ya ce manufar sa ba wai ya samu filaye kyauta ba ne, amma ya tabbatar da an samar da jirgin ƙasan da zai riƙa jigilar al’umma a cikin birnin.

Nysom Wike dai ya riƙa haifar da muhawara tun bayan zama minista, sakamakon alwashin da ya ci na rusa gine-ginen da aka yi ba bisa ƙa’ida ba.

Yayin wata ziyarar gani da ido, Ministan ya ce ya kamata a kammala aikin layin jiragen kasa na birnin Abuja nan da watanni takwas masu zuwa.